ဆရာတော်ကြီးတွေရဲ့ တိုင်းမှုးဆီပို့တဲ့ မေတ္တာရပ်စာ
ရခိုင်ပြည်နယ် စစ်တွေမြို့ မဟာမုနိ ဗုဒ္ဓဝိဟာရ ကျောင်းတိုက်က ဆရာတော် ဦးပညာစာရကို မာတုဂါမနဲ့ ဖေါက်ပြားတယ်ဆိုတဲ့ စွပ်စွဲချက်အပါအဝင် အခြားစွပ်စွဲချက်တွေနဲ့ အာဏာပိုင်တွေက ဖမ်းဆီးလူဝတ်လဲ ထားတာကို တရားသဖြင့်ဖြစ်အောင် ဆောင်ရွက်ပေးဖို့ ရခိုင်ပြည်နယ်ထဲက ဆရာတော်ကြီး ၁၅ ပါးက အနောက်ပိုင်းတိုင်း တိုင်းမှူးဆီ စာရေးသား မေတ္တာရပ်ခံလိုက်ပါတယ်။
ဆရာတော်ကြီး ၁၅ ပါးက စက်တင်ဘာလ ၇ ရက်နေ့မှာ တိုင်းမှူးဆီကို ဒီ အသနားခံစာကို တင်ခဲ့တာဖြစ်တယ်လို့သိရပါတယ်။
စာရေးသားပေးပို့ခဲ့တဲ့ ဆရာတော်တွေထဲမှာ စစ်တွေက ပုသိမ်ကျောင်းတိုက်၊ ဘင်္ဂလား အဝကျွန်းကျောင်းတိုက်၊ ဝေသာလီ ဓမ္မရတနာ ကျောင်းတိုက်၊ နိဂြောဓာရုံကျောင်းတိုက်၊ ဘီလူးချောင်း ကျောင်းတိုက်၊ ဓမ္မပါလကျောင်းတိုက်နဲ့ မင်းပြားမြို့နယ် ပန်းမြောင်းရွှေဖေါင်တော် ကျောင်းတိုက်က ဆရာတော်ကြီးတွေ ပါဝင်ပါတယ်။
“ဦးဇင်းတို့က တရားဥပဒေနဲ့ ညီမျှတဲ့ ဆုံးဖြတ်ချက်ရအောင် တိုင်းမှူးထံကို အသနားခံစာတင်လိုက်တယ်” လို့ အသနားခံစာ တင်တဲ့အထဲမှာ ပါဝင်တဲ့ ဆရာတော်တစ်ပါးက ဘီဘီစီကို မိန့်ကြားပါတယ်။
အခုအရေးယူ ဆောင်ရွက်မှုဟာ တရားဥပဒေနဲ့ ညီညွတ်တယ် မညီညွတ်ဘူး ဆိုတာကို ဦးဇင်းတို့ အနေနဲ့ မပြောလိုတဲ့ အကြောင်း၊ စွပ်စွဲထားသလို အမျိုးသမီးနဲ့ မှောက်မှားတဲ့ ပထမ ပါရာဇိကဖြစ်ရင် ဝိနည်းတော်အရ အရေးယူရင် ပြီးတယ်လို့ ဆရာတော်က ဘီဘီစီကို မိန့်ကြားပါတယ်။
ဆရာတော် အရှင်ပညာစာရကို ဇူလိုင်လ ၂၇ ရက်နေ့က မာတုဂါမနဲ့ ဖေါက်ပြန်တယ်ဆိုတဲ့ စွပ်စွဲချက်တွေအပါအဝင် တခြားပုဒ်မတွေနဲ့ အာဏာပိုင်တွေက ဖမ်းဆီး လူဝတ်လဲပြီး စစ်တွေထောင်ထဲမှာ ချုပ်နှောင် စစ်ဆေးနေတယ်လို့ သိရပါတယ်။
www.4proxy.de
http://www.bbc.co.uk/burmese/burma/2010/09/100910_monk_appeal.shtml